RIWAYAT SINGKAT KANGJENG NABI S.A.W. DUGI KA ISRO SARENG MI’RAJ

Nasab Kangjeng Nabi

Nasab ti Jihat Rama:

Kangjeng Nabi teh eta putra Sayyid Abdullah, Sayyid Abdullah putra Sayyid Abdul Muththolib (jenengan aslina Syaibah), mantena putra Sayid Hasyim, mantena putra Sayid Abdi Manaf, mantena putra Sayid Qushoy, mantena putra Sayid Kilab, Sayid Kilab putra Sayid Murroh, Sayid Murroh putra Sayid Ka’ab, Sayid Ka’ab putra Sayid Lu-ay, Sayid Lu-ay putra Sayid Gholib, Sayid Gholib putra Sayid Fihir, Sayid Fihir putra Sayid Malik, Sayid Malik putra Sayid Nadlor, Sayid Nadlor putra Sayid Kinanah, Sayid Kinanah putra Sayid Khuzaimah, Sayid Khuzaimah putra Sayid Mudrikah, Sayid Mudrikah putra Sayid Ilyas, Sayid Ilyas putra Sayid Mudlor, Sayid Mudlor putra Sayid Nizar, Sayid Nizar putra Sayid Ma’ad, Sayid Ma’ad putra Sayid ‘Adnan. Dugi kadieu rundayan Kangjeng Nabi anu wajib dikanyahokeun anu shoheh perjalan riwayatna. Ari  Sayid ‘Adnan eta keturunan ti Nabi Isma’il a.s.

Nasab ti Jihat Ibu:

Kangjeng Nabi s.a.w. putra Siti Aminah, Siti Aminah Putri Sayid Wahab, Sayid Wahab putra Sayid ‘Abdi Manaf, Sayid Abdi Manaf putra Sayid Zuhroh, Sayid Zuhroh putra Sayid Kilab.

Nasab Kangjeng ti jihat ibu sareng rama kempelna di Sayid Kilab teras ka luhur.

 

Taun Dipedalkeun Kangjeng Nabi S.A.W.

Dina waktos Siti Aminah ngandeg ku Kangjeng, dina yuswa 2 sasih kakandungan, mantena dikantun wafat kunu janten carogena Sayid Abdullah.

Dina yuswa 9 sasih numutkeun kaol anu masyhur mantena dihadiran ku dua istri ti surga nyaeta Siti Asiah sareng Siti Maryam diiring ku sapirang-pirang widadari ti surga bade ngarawatan mantena jalaran bade medalkeun kadeudeuh Allah Kangjeng Nabi Muhammad s.a.w.

Kangjeng Nabi dipedalkeun dina dinten senen ping 12 Rabiul Awwal taun 571 M. anu disebut tauh Gajah di kota Mekah. Seueur pisan kaanehan dina waktos medal mantena, diantawisna jin syetan teu bisa deui ulin ka langit dunya, seuneu sesembahan raja Persi parem harita keneh sareng sajabina, eta teh totonden kana medalna nu jadi rohmat ka sakabeh alam.

Dina yuswa 25 tahun mantena nikah ka siti Khodijah binti Khuwailid janda kaya anu geulis tur soleh.

Saparantos Kangjeng Nabi nikah ka Siti Khodijah, teras bumen-bumen di nagri Mekah al-Musyarrofah, istuning runtut raut, repeh rapih, luyu taya pisan pacekcokan, sili asih sili ayunkeun kapalay estu matak lucu, ceuk paripaos tea mah ka cai jadi saleuwi ka darat jadi salebak. Kangjeng sareng Siti Khodijah hanteu saat-saat digayu ku hujan rohmat saparantos kagungan putra anu janten buah manah aranjeuna duaan.

Pala Putrana Kangjeng Nabi

Ari putra-putrina Kangjeng Nabi eta aya 7:

1. Sayid Qosim
2. Sayid Abdullah anu katelah Thoyib sareng Thohir
3. Sayid Ibrohim (putra ti Siti Mariyah Qibtiyah)
4. Siti Zaenab
5. Siti Rukoyah
6. Siti Umi Kulsum
7. Siti Fatimah.

Taun Diinstrenan Janten Nabi Sareng Rosul

Barang yuswa kangjeng cekap pisan 40 taun, kaetang parantos 15 taun garwaan nana ka Siti Khodijah, anjeuna dipaparin nugraha anu pohara ku Gusti Anu Maha Kawasa yaeta anjeuna diturunan wahyu dipaparin pangkat Rosul kalawan disumpingan malaikat Jibril a.s.

Saparantosna anjeuna nampi wahyu, lajeng anjeuna ngajak-ngajak ka kaom-kaom nagara Mekah kana agama anu hak kana ibadah ka Gusti Allah nyalira, tilar agama musyrik sareng adat tobe’at anu keji. Kujalaran urang Mekah diharu diganggu agamana anu ceuk maranehan nana mah agama bener, pohara ngabarontakna, pohara ngalawana sahingga toh pati jiwa raga dina ngabela agamana, nangin sanaos urang nagara Mekah pohara ngamusuhannana pohara ngahalangannana kana pangajakna kangjeng Nabi, anjena henteu gedag kaanginan henteu unggut kalinuan, tetep tengtrem anteng ngajak-ngajak kana agama anu hak kalawan manah anu pinuh ku kayakinan sareng kasabaran dugika dhohirna agama hak katingali cahayana. Agama Islam moncorong nyaangan ka sakuliah dunya. Pangajakna Kangjeng Nabi ka urang Mekah disarengan kuningalikeun hujah anu pertela, katerangan-katerangan anu atra sahingga seuseueurna urang Mekah sanaos lisana henteu kadugaeun ngaku kana kabeneran nana Kangjeng Rosul, nanging hatena mah ngaku kana benerna Kangjeng Rosulullah s.a.w. sarta rumasa kana kaapesan ngalawan hujah-hujahna.

Tina margi kitu urang nagara Mekah anu dikapalaan ku Abu Jahal ngadamel riungan permufakatan anu putusan nana bade ngawut-ngawut kana perjuangan Rosul, rek nyebarkeun fitnah jeung sajabina, mung saperkawis anu dipikarisi ku kaom Musyrikin teh nyaeta pamana Kangjeng Rosul “Abu Tholib” ramana Sayidina Ali, kaom musyrikin nepikeun darongkap ka Abu Tholib nyuhunkeun Kangjeng Nabi, wireh teu ditebihan ku Abu Tholib, saur Abu Tholib: “Lamun onta indungna masih nyaaheun ka anakna, kaula moal bisa masrahkeun Muhammad ka aranjen”. Atuh kaom musyrikin teh luput teu hasil maksudna.

Taun Di Isrokeun Sareng di Mi’rajkeun Kangjeng Nabi s.a.w.

Barang dina tengah-tengah sasih Syawal taun ka 10 tina jeneng mantena janten Rosul, Abu Tholib pupus dina yuswa 87 taun, ku pupusna Abu Tholib kaum Musyrikin jijingklak pada bungah margi laluasa ngaganggu ka Kangjeng Rosul s.a.w., sasih eta kenenh pupus deui Siti Khodijah gerhana Kangjeng Nabi s.a.w. Jadi dina taun eta parantos dua cocobi anu nimpah ka salirana Kangjeng nabi s.a.w. saurna taun ieu dingaranan Taun Hazan hartosna taun kanalangsaan. Saparantos pupus Siti Khodijah Kangjeng nikah ka Siti Saodah binti Jam’ah.

Saparantos pupus Abu Tholib, pohara seueurna gangguan ti kaom Musyrikin, cariosan-cariosan anu matak pikaijideun sareng tingkah-tingkah anu matak pikacuaeun anu ditampi ku Rosulullah s.a.w. kalawan manah anu pinuh ku hilim sareng kasabaran.

Saparantosna kengeng tilu sasih tina pupusna Siti Khodijah, teras angkat ka Thoif disarengan ku Zaid bin Haritsah rehing di Thoif seueur wargi-wargi. Anjeuna kengeng sasasih ngajak-ngajak urang Thif kana agama Islam, nanging urang Thoif langkung kejem tibatan urang Mekkah, buktosna sajabi tinyarek teh dugika maledogan ku batu kana sampeannana, tarumpahna dugika pinuh ku getih, mastaka Zaid bin Haritsah dugika boborot getih jalaran ngajagi Kangjeng. Mulihna ti Thoif kalintang prihatinna teras anjena ngadu’a ku du’a anu masyhur du’a Thoif nyaeta:

ٱللَّهُمَّ إِلِيْكَ أَشْكُوْ

dugi kana :

وَلاَ قُوَّةَ إِلاَّ بِكَ

Barang parantos ngadu’a sumping para malaikat anu nyangking gunung teras unjukan, saurna: “Gusti upami gusti ngawidian ayeuna urang nagara Mekkah bade ditinggang ku dua gunung”. Timbalan Kangjeng: “Entong!, mudah-mudahan Gusti Allah ngaluarkeun tina iga urang Mekah jalma anu ibadah ka Gusti Allah”.

Ari anu pang bencina ka Rasulullah s.a.w. sareng pang seueurna nganyenyerina nyaeta :

1. Abu Lahab bin Abdul Muththolib (paman Kangjeng)
2. Abu Jahal bin Hisyam alias Abul Hakam.
3. Adi bin Hisyam (dulur Abu Jahal)
4. Wuled bin Atabah
5. Abul-Buhtari
6. Atabah bin Rubai’ah
7. Syaibah bin Rubai’ah.

Barang dina wengi senen kaping 27 Rajab taun ka 11 tina jeneng Rasul. Kangjeng Rasulullah s.a.w. diselir ku Gusti Anu Maha Kawasa angkat ka baitul Muqaddas tunggang Burok disarengan ku malaikat Jibril sareng para malikat anu sanesna (anu disebat Isro tea). Ti Baetul Moqaddas teras angkat ka langit anu tujuh dina taraje ti surga, ti dinya teras ka Sidratul Muntaha, ka Mustawan, ka ‘Arasy dongkap kahiji tempat anu tara kasorang ku bangsa jin sareng manusa, malih tara kasaba sanajan ku malaikat Muqorrobin. Didinya anjena nampi timbalan tinu Maha Suci sareng didinya anjena dipaparin pangkat anu agung nyaeta pangkat Habibullah. (tah ieu anu disebut Mi’raj tea).

Wengi eta keneh anjena mulih deui ka nagri Mekah al-Musyarrofah. Dina enjingna ku anjena diuningakeun ka kaom Mekkah yen wengi tadi anjena angkat ka Baetul Muqaddas.

Ceuk Kaom Mekah: “Muhammad anjen ayeuna asa beuki rahul, nyarita teh anu lain-lain?, tapi cing caritakeun kaayaan Masjid Baetul Muqaddas, jeung palebah mana anjeun papanggih jeung ontan-ontan urang Mekah anu baralik dagan ti Syam, jeung iraha kira-kira pidatangeun nana?”.

Tidinya teras ku Kangjeng Nabi dicarioskeun sifatna masjid Baetul Muqaddas sareng ontan-ontan anu kapendak waktos mulih sareng dinten pidongkapeun nana, sakumaha cariosan Kangjeng Nabi henteu aya anu mencog saeutik-eutik acan.

Ari saparantosna bukti bebeneran nana kangjeng Nabi, batan percaya mah kalah nuding sihir.

Pependakan Dina Waktos Isro Sareng Mi’raj

Dina waktos Isro sareng Mi’raj aya sababaraha kajadian anu kapendak ku kangjeng Nabi s.a.w. nyaeta:

Dina Waktos Isro

1.      Mantena dicandak ku Malaikat Jibril sareng Mikail ka sumur zamzam, teras dibelek dadana disampurnakeun kahiliman, kaimanan, kaislaman sareng kayakinannana, dilaan sifat-sifat anu matak ngurangan kana pangkat kanabian sareng karasulan nana.

2.      Ditunggangkeun kana Burok, nyaeta tutunggangan anu bodas ti surga, anu jangkungna saluhureun himar sahandapeun bigal, anu ngagaduhan jang-jang dina dua pahana, anu tarikna tarik alabatan kilat salengkahna satungtung deuleu, dimana manggihan mudun suku hareup ngajangkungan jeung dimana manggih nanjak suku tukangna anu ngajangkungan.

3.      Dipiwarang netepan di sababaraha tempat, anu maksadna tabarruk (ngalap berkah kana patilasan jalmi-jalmi anu soleh), nyaeta:

1. di Toyibah, nu katelah madinah al-Munawwaroh anu bahan pinagaraeun mantena sareng ka dinya mantena hijrah (ngalih).
2. di Madyan, nyaeta di caket tangkal kai patilasan lelesonna Nabi Musa a.s. tina dibeberik ku Firaun sabalad-balad.
3. di Turisina, nyaeta patilasan Nabi Musa munajat ka Gusti Allah dugika dibukakeun hijab sifat kalam Allah ka mantena.
4. di Baet Lehem, nyaeta tempat patilasan dipedalkeun nana kangjeng Nabi ‘Isa a.s.

4.      Papendak jeung Ifrit, nyaeta jurig anu ngudag-ngudag ka Kangjeng Nabi, tapi ku Nabi teu diwaro, malah di du’akeun sina binasa. Anu du’ana nyaeta:

أَعُوْذُ بِوَجْهِ ٱللهِ الْكَرِيْمِ وَبِكَلِمَاتِ ٱللهِ التَّامَّاتِ الَّتِي لاَيُجَاوِزُهُنَّ بَرٌّ وَلاَفَاجِرٌ مِنْ شَرِّمَا يَنْزِلُ مِنَ السَّمَآءِ وَمِنْ شَرِّمَا يَعْرُجُ فِيْهَا وَمِنْ شَرِّمَا ذَرَأَ فىِ الْأَرْضِ وَمِن شَرِّمَا يَخْرُجُ مِنْهَا وَمِنْ فِتَنِ اللَّيْلِ وَالنَّهَارِ وَمِنْ طَوَارِقِ اللَّيْلِ وَالنَّهَارِ إِلاَّطَارِقًا يَطْرُقُ بِخَيْرٍ يَارَحْمَنُ

5.      Papendak sareng kaom anu tandur harita keneh panen oge harita keneh, nyaeta gambaran ganjaran umat Kangjeng anu jihad fi sabilillah.

6.      Papendak sareng seungitna Siti Masyitoh, nyeta hiji istri anu jajim dina kayakinannana.

7.      Papendak sareng kaom anu ditinggangan sirahna ku batu, nyaeta siksaan jalma-jalma anu berat embung ngalakonan shalat anu lima waktu.

8.      Papendak sareng kaom anu dibincang tiharep ti tukang bari didiring-giring kana cucuk sina ngadalahar kai zaqum anu pait kacida, nyaeta siksaan jalma-jalma anu tara nyumponan zakat.

9.      Papendak jeung kaom anu ngadalaharan daging atah bari sing jarerit bakating ku nyerina siksaan, nyaeta siksaan jalma-jalma anu sok zina.

10.  Mendakan rungkang anu ngahalangan jalan anu ngaruksak ka saha bae anu ngaliwat, nyaeta siksaan ka jalma-jalma anu sok ngalang-halang jalma anu rek ibadah.

11.  Mendakan anu kokojayan dina naraka bari dibaledogan ku batu naraka, nyaeta siksaan ka jalma-jalma anu ngadalahar barang riba.

12.  Mendakan anu ngagunduk-gunduk suluh pangguleun tapi teu kabawaeun malah ditambahan deui, nyaeta siksaan ka jalma-jalma anu teu ngalakonan amanat.

13.  Mendakan anu digaruntingan letahna, nyaeta jalma-jalma anu sok nguar-ngaer fitnah.

14.  Mendakan jalam-jalma anu nyalakaran beungeut jeung awakna, nyaeta siksaan ka jalma-jalma anu sok ngomongkeun batur jeung ngadu-ngadu.

15.  Mendakan sapi gede bijil tina liang leutik hayang asup deui tapi teu bisa, nyaeta gambaran siksaan jalma anu tisoledat letahna teu bisa ngomean deui kana kasalahannana.

16.  Mendakan anu gegeroan ti belah katuhu tapi ku Nabi teu ditolih, nyaeta pangajakna urang Yahudi.

17.  Mendakan anu gegeroan ti belah kenca tapi ku Nabi teu ditolih deui bae, nyaeta pangajakna urang Nasrani.

18.  Mendakan nini-nini ginding reunceum ku papaes, nyaeta gambaran dunya.

19.  Mendakan aki-aki anu tawehwoh ngahalang-halang hayang diwaro, ngan ku Nabi teu dipalire, nyaeta Iblis la’natullah.

20.  Mendakan nini-nini peot kacida, nyaeta gambaran umur dunya.

21.  Dugi ka Baetul Muqaddas. Didinya mantena netepan berjamaan sareng sadaya arwahna para Nabi katut para malaikat. Teras sasarengan maos Tahmid ka Gusti Allah, mantena maos:

الحَمْدُللهِ الَّذِيْ اَرْسَلَنِيْ رَحْمَةً لِلْعَالَمِيْنَ وَكَافَّةً لِلنَّاسِ بَشِيْرًا وَنَذِيْرًا وَأَنْزَلَ عَلَيَّ الْقُرْآَنَ فِيْهِ تِبْيَانٌ لِكُلِّ شَيِْئٍ وَجَعَلَ أُمَّتِيْ خَيْرَ أُمَّةٍ اُخْرِجَتْ لِلنَّاسِ وَجَعَلَ أُمَّتِيْ وَسَطًا وَجَعَلَ أًُمَّتِيْ هُمُ الْاَوَّلُوْنَ وَالآَخِرُوْنَ وَشَرَحَ لِيْ صَدْرِيْ وَوَضَعَ عَنِّى وِزْرِىْ وَرَفَعَ لِى ذِكْرِى وَجَعَلَنِى فَاتِحًا وَخَاتِمًا

Dina Waktos Mi’raj

1.      Naek ka langit kahiji, nyaeta langit anu didamel tina perak bodas, di dinya papendak sareng Nabi Adam a.s.

2.      Naek ka langit kadua, di dinya mantena tepang sareng Nabi ‘Isa bin Maryam a.s. sareng Nabi Yahya a.s.

3.      Naek ka langit katilu, di dinya mantena tepang sareng Nabi Yusuf a.s.

4.      Naek ka langit kaopat, di dinya mantena tepang sareng Nabi Idris a.s.

5.      Naek ka langit kalima, di dinya mantena tepang sareng Nabi Harun a.s.

6.      Naek ka langit kagenep, di dinya mantena tepang sareng Nabi Musa a.s.

7.      Naek ka langit katujuh, di dinya mantena tepang sareng Nabi Ibrohim a.s.

8.      Nampi oleh-oleh ti Nabi Ibrohim, nyaeta mantena miwarangan ka Kangjeng Nabi supados marentah ka umatna nyeueurkeun tataneman surga, nyaeta:

سُبْحَانَ ٱللهِ وَالْحَمْدُ ِللهِ وَلآَإِلٰهَ إِلاَّ ٱللهُ وَٱللهُ أَكْبَرُ وَلاَحَوْلَ وَلاَ قُوَّةَ إِلاَّ بِٱللهِ الْعَلِيِّ الْعَظِيْمِ

9.      Teras naek dugika sidrotul muntaha, dugi ka nguping kana geretannana sora kalam anu nyatetkeun sakabeh kajadian makhluk tiwit didamel dugika Qiyamah.

10.  Dugi ka maqom mukafahah, nyaeta tempat jongok sareng Gusti Allah, mantena tiasa ningal kalawan paningalna anu dhahir tina hadlroh kapangeranan.

11.  Nampi timbalan ti Allah s.w.t. kafardluan shalat 50 kali sadinten sawengi anu janten lima kali sadinten sawengina.

Sapalihna Budi Pekerti Kangjeng Nabi

Kabuktosan Kangjeng Nabi teh eta anu banget isinna ku Gusti Alloh, banget handap asorna hormat kasaluhureun ngahargaan kasasama, nyaah kasahandapeun, nyakitu deui mantenna mah henteu gumede pedah pangkat luhur.  Mantena sok kersaan ngesol tarumpahna kunyalira, nyakitu deui ngaputan raksukan ku nyalira, tara miwarang kabatur atawa  ngantosan aya anu pang ngaputkeun sanaos kabojona, mۤerۤes ۤembe ku nyalira, cakah-cikih dina ngaladen nu janten kulawargana. Mantena banget cinta ka fakir jeung miskin teu isin masamoan sareng maranehna, teu liren ngalayad anu teudamag, mulasara anu ngantunkeun, tara pisan ngahinakeun ka jalma anu lemah jeung kokoro. Mantena sok nampi kanu nyuhunkeun dihapunten, tara mulang sengit sanajan dipikasengit ku batur, mun mapah kalintang rantah rintih pinuh ku sifat kahambaan. Mantena teu inggis ku raja, istuning bengisna teh karena Allah, sareng ridlo kanu dipikaridlo ku Gusti Allah. Upami angkat-angkatan sareng sahabat, mantena mah sok dipengkereun nana malah dawuhna: “kosongkeun tukangeun kami keur para malaikat ruhaniyah”. Nunggang tutunggangan teu pilih bulu, bade kuda, bade bigal, bade himar ge sami bae kumaha dipasihan nana bae. Salamina patuangannana diganjel ku batu tina bakating lapar anu ditahan padahal mantena dipasihan koncina gudang eusina bumi, sahingga gunung-gunung pada nawisan janten emas kanggo mantena. Rasulullah s.a.w. kalintang pisan nyakedikeun guyon catur, salamina uluk salam kasaha bae anu tepang, dina netepanna anteng sareng lami, singkat pisan dina khutbahna namung patri, mantena sok miheman ka ahli kamulyaan, ngamulyakeun ka ahli kautamian, salamina campur sareng marantena, sareng tara cumarios anging anu hak sareng bener anu dipikaasih ku Gusti Allah s.w.t.

Wallahu ‘Alam bissawab

Disarikan oleh Iwan Rozie